Futbol üzrə Azərbaycan Premyer Liqasının 2023/2024 mövsümünün 8-ci turu “Araz-Naxçıvan” üçün əlamətdar olub.
Arena.az xəbər verir ki, Muxtar Respublika təmsilçisi ölkə çempionatının yüksək dəstəsində 50-ci matçını keçirib.
Bu, “Zirə” ilə ev qarşılaşmasına təsadüf edib. Görüşdə minimal hesabla qələbə qazanan meydan sahibləri yubileydə üç xala sevinib – 1:0.
2000/2001 və 2001/2002 mövsümlərində də elitada çıxış edən “Araz-Naxçıvan” 3-cü dəfə mübarizə aparır. 2014/15 mövsümündə Premyer Liqada yarışa başlayan komanda mübarizəni erkən dayandırdığı üçün həmin nəticələr ləğv edilib.
50 qarşılaşmada 14 qələbə və 9 heç-heçəsi olan naxçıvanlılar 27 dəfə uduzub. Komandanın debütü isə 2000-ci il avqustun 5-də gerçəkləşib. “Qarabağ”ın qonağı olan Naxçıvan təmsilçisi səfərdən xalsız ayrılıb – 0:1.
