“Barselona”nın futbolçuları yeni quraqlıq tədbirləri səbəbindən paltardəyişmə otaqlarında duş qəbul edə bilməyəcəklər.
Arena.az bu barədə “Mundo Deportivo” nəşrinə istinadən məlumat verir.
Kataloniya Generalitatı quraqlığın təsirlərini yumşaltmaq üçün bir sıra tədbirlər təyin edib və idman salonlarında, mərkəzlərdə duşlardan istifadəyə icazə verməyəcək. Bu, “Barselona” və “Jirona”nın futbolçularına da təsir edəcək.
Tədbirlərin tətbiqini İqlim, Qida və Kənd İşləri üzrə Nazir Devid Maskort təsdiqləyib. Generalitat tədbirlərinə riayət etmək üçün futbolçular indi evdə duş qəbul etməlidirlər. Onların nə məşq zamanı, nə də oyundan sonra duşa girməsinə icazə verilməyəcək.
Kataloniyadakı cari quraqlıq son 100 ildə özünün ən pis təzahürü ilə tanınır. Su anbarlarında suyun səviyyəsi rekord həddə düşüb.
