“Real”ın mərakeşəsilli ispaniyalı hücumameyilli yarımmüdafiəçisi Braim Dias Mərakeş yığmasında oynamaq haqda verdiyi qərarını şərh edib.
Arena.az “Marca” nəşrinə istinadən, Diasın bu barədə fikirlərini təqdim edir:
“İspaniyanın və Mərakeşin mənə verdiyi sevgi çox böyükdür, bu, iki gözəl ölkədir. Mənim Mərakeş köklərim var, amma İspaniyada böyümüşəm.
İspaniyaya qol vursam qeyd edəcəyəmmi? İndi sizə nə deyəcəyimi bilmirəm, amma deyəcəyəm ki, qərarıma yüz faiz əminəm. Mən həmişə ürəyimlə qərar verirəm, bu dəfə də belə oldu. Mən sadəcə xəyalları olan bir oğlanam. Mərakeşə və layihəsinə sevgi mənə çox yaxşı görünür. Qərar verilib. İndi nə olacağını düşünməyə ehtiyac yoxdur, əgər ki… İspan məşqçinin məni qərar qəbul etmək üçün çağırıb-çağdırmayacağı barədə düşünməmişdim”, deyə Dias vurğulayıb.
Xatırladaq ki, bundan əvvəl İspaniya Kral Futbol Federasiyası (RFEF) yarımmüdafiəçinin namizədliyinə maraq göstərməmişdi. Belə olduğu halda Dias tarixi vətəninin lehinə seçim edib.
Xatırladaq ki, martın 11-də Braim Dias Mərakeş yığmasına qoşulduğunu açıqlayıb.
Braim Malaqada (İspaniya) anadan olub, amma Diasın valideynləri mərakeşəsillidirlər.
Dias İspaniya yığmasının heyətində cəmi 1 yoldaşlıq oyunu keçirib. 2021-ci ilin iyun ayının 8-də Dias Litva yığması ilə yoldaşlıq oyununda meydana çıxıb və “qırmızı qəzəb”in 4:0 hesabı qalib gəldiyi oyundan qollardan birinin müəllifi olub.
Braim Dias “Malaqa”da futbola qədəm qoyub. Buradan “Mançester Siti” akademiyasına yol tapmış Braim 2019-cu ilin yanvarında “Real” tərəfindən alınıb. “Kral klubu” Diası bir müddət “Milan”da icarədə oynadıb və tərəqqi etmiş futbolçusunu ötən ilin yayında yenidən heyətinə qaytarıb.
Cari mövsümdə Dias “Real”ın heyətində bütün yarışlarda 32 oyuna çıxıb, 8 qol vurub, 4 məhsuldar ötürmə verib.
Braim Diasın qənimətlər muzeyində “Mançester Siti” ilə qazandığı İngiltərə Premyer Liqası, İngiltərə Liqa Kuboku (2 dəfə), İngiltərə Super Kuboku, “Milan”la İtaliya A Seriyası çempionluğu, “Real”la İspaniya La Liqası çempionluğu, İspaniya Super Kuboku (2 dəfə) var.
“Transfermarkt” internet-portalı 24 yaşlı hücumameyilli yarımmüdafiəçinin transfer dəyərini 20 milyon avro məbləğində qiymətləndirir.
