46 yaşlı danimarkalı futbol mütəxəssisi Brayan Rimer Danimarka milli komandasının yeni baş məşqçisi təyin edilib.
Arena.az bu barədə Danimarka Futbol Assosiasiyasının mətbuat xidmətinə istinadən xəbər verir.
Xəbərdə bildirilir ki, Rimerlə 2 illik müqavilə imzalanıb. Danimarkalı məşqçi ən azı 2026-cı ilin 15 iyuluna kimi ölkəsinin yığmasına rəhbərlik etməlidir.
Brayan Rimerin məşqçi kimi elə də ciddi uğurları yoxdur. O, “Kopenhagen”in U-19 komandasında baş məşqçi olub, həm sözügedən klubun, həm də “Brentford”un əsas komandasında assistent kimi çalışıb.
Brayan Rimer 2022-ci ildən Belçikanın “Anderlext” komandasında baş məşqçi idi. O, sözügedən klubdan bu ilin sentyabr ayında ayrılıb. “Anderlext” Rimerin rəhbərliyi altında 76 oyuna çıxıb, 39 qələbə qazanıb, 20 heç-heçə edib, 17 məğlubiyyətə üzülüb.
Xatırladaq ki, Danimarka millisinə son olaraq Kasper Yulmann rəhbərlik edib. O, bu ilin iyul ayında yığmadan ayrıldığını açıqlamışdı.
