AFFA-da avrokuboklarda və Azərbaycan Premyer Liqasında iştirak üçün lisenziya əldə etmiş klubların nümayəndələri ilə görüş keçirilib.
Arena.az xəbər verir ki, bu barədə qurumun rəsmi saytı məlumat yayıb.
Xəbərdə bildirilir ki, bu gün AFFA-nın inzibati binasında 2023/2024-cü illər lisenziyalaşdırma mövsümündə UEFA-nın klub yarışlarında və Azərbaycan Premyer Liqasında iştirak etmək üçün lisenziya əldə etmiş klubların nümayəndələri ilə görüş baş tutub.
Təltifetmə mərasimində iştirakçılara mövsümün yekunları və növbəti mövsüm üçün lisenziyalaşdırma qaydalarında gözlənilən dəyişikliklər barədə məlumat verilib.
Cari mövsümdə Lisenziya Menecerləri üçün təşkil olunmuş imtahandan müvəfəqqiyyətlə keçmiş klub əməkdaşlarına sertifikatlar təqdim edilib.
Tədbirin sonunda isə növbəti mövsümdə çıxış etmək üçün lisenziya əldə etmiş klublar müvafiq lisenziyalarla təltif olunub.
Xatırladaq ki, UEFA-nın klub yarışlarında iştirak etmək üçün aşağıdakı klublara lisenziya verilib: “Qarabağ”, “Sabah”, “Neftçi”, “Zirə”, “Qəbələ”.
UEFA-nın klub yarışlarında iştirak etmək üçün aşağıdakı klublara lisenziya verilməyib: “Turan Tovuz”, “Səbail”.
Premyer Liqa yarışlarında iştirak etmək üçün aşağıdakı klublara lisenziya verilib: “Turan Tovuz”, “Səbail”, “Sumqayıt”, “Kəpəz”, “Şamaxı”, “Araz Naxçıvan”, “Zaqatala”.
Premyer Liqa yarışlarında iştirak etmək üçün aşağıdakı klublara lisenziya verilməyib: “İmişli”, “Mingəçevir”, MOİK, “Qaradağ Lökbatan”.
“UEFA-nın klub yarışlarında iştirak etmək üçün Azərbaycan futbol klublarının lisenziyalaşdırılması və maliyyə dayanıqlığı üzrə qaydalar” (Buraxılış 2022), 14-cü maddəsinə müvafiq olaraq, 2023/24 mövsümündə UEFA-nın klub yarışlarında iştirak etmək üçün lisenziya almış klublar avtomatik olaraq eyni mövsüm üçün Azərbaycan Premyer Liqasında iştirak etmək üçün lisenziya almış hesab olunur.
