Bu gün futbol üzrə Avropa Konfrans Liqasının 2022/2023 mövsümünün final qarşılaşması keçirilib.
Arena.az xəbər verir ki, turnirin final oyununda İtaliyanın “Fiorentina” və İngiltərənin “Vest Hem” komandaları üz-üzə gəliblər.
Çexiyanın paytaxtı Praqadakı “Eden Arena”da keçirilən qarşılaşmanı İspaniyadan olan FIFA referisi Karlos Del Serro idarə edib.
Matçın ilk hissəsi qolsuz yekunlaşıb. Daha dəqiqi, İtaliya təmsilçisi fasiləyə qədər bir qol vursa da, VAR incələməsindən sonra ofsayd səbəbindən qolun ləğvinə qərar verilib. Bir saatın tamamında isə İngiltərə təmsilçisi penalti vurmaq hüququ qazanıb və bu şansdan maksimum yararlanıb. Florensiya klubu buraxılan qolun əvəzini vaxtında çıxsa da, 90-cı dəqiqədə yenidən önə keçən “Vest Hem” çempionluğu təmin edib.
Beləcə, İngiltərə təmsilçisi Avropa Konfrans Liqasının 2022/2023 mövsümünün qalibi olub.
Xatırladaq ki, Avropa Konfrans Liqasında ilk qalib ötən mövsüm çempion olmuş İtaliyanın “Roma” komandasıdır. Hansı ki, Joze Mourinyonun çalışdırdığı “canavarlar” bu mövsüm də Avropa Liqasında final oynamaq şansı qazanmışdılar. Amma İtaliya təmsilçisi İspaniya “Sevilya”sına məğlub olaraq Avroliqanın gümüş medalları ilə kifayətlənib.
Bu mövsüm avrokubokların yekunlaşmasına cəmi bir oyun qalıb. İyunun 10-da UEFA Çempionlar Liqasının finalında İngiltərənin “Mançester Siti” və İtaliyanın “İnter” komandaları üz-üzə gələcəklər.
Avropa Konfrans Liqası
Final
7 iyun
Fiorentina (İtaliya) – Vest Hem (İngiltərə) 1:2
Qollar: Bonaventura, 67 – Benrahma, 62-pen. Bouen, 90.
Baş hakim: Karlos Del Serro (İspaniya).
Praqa, “Eden Arena”.
Fiorentina: Pyetro Terraçiano, Kristiano Biraqi, Luka Ranyeri (İqor 84), Nikola Milenkoviç, Dodo, Rolando Mandraqora (Antonin Barak, 90+3), Sofyan Amrabat, Cakomo Bonaventura, Kristian Kuame (Rikkardo Saponara, 62), Luka Yoviç (Artur Kabral, 46), Nikolas Qonsales.
Baş məşqçi: Vinçentso İtalyano.
Vest Hem: Alfons Areola, Emerson, Nayef Agerd, Kurt Zuma (Tilo Kehrer, 61), Vladimir Çoufal, Lukas Paketa, Deklan Rays, Tomaş Souçek, Said Benrahma (Pablo Fornals, 76), Maykl Antonio (Anxelo Oqbonna, 90+4), Carrod Bouen.
Baş məşqçi: Devid Moyes.
