Futbol üzrə UEFA Çempionlar Liqasında 3-cü təsnifat mərhələsinin bütün cütləri müəyyənləşib. Arena.az xəbər verir ki, Azərbaycan çempionu “Qarabağ”ın da növbəti rəqibi bəlli olub.
ÇL-in 2-ci təsnifat mərhələsində İsveçrə “Sürix”ini üstələyən Ağdam klubu növbəti raundda “Ferentsvaroş”la (Macarıstan) qarşılaşacaq. Püşkə əsasən, “Qarabağ” ilk görüşünü 2-3 avqustda öz meydanında, cavab qarşılaşmasını isə 9-10 avqustda səfərdə keçirəcək.
Yeri gəlmişkən qeyd edək ki, “Qarabağ” ÇL-də 3-cü mərhələyə yüksəlməklə Avropa Konfrans Liqasında qrup mərhələsinə vəsiqəni təmin edib. Ağdam klubu “Ferentsvaroş” səddini keçə bilməsə, Avropa Liqasının pley-offunda mübarizə aparacaq. Komandamız oradakı rəqibinə də uduzacağı halda, mübarizəni Avropa Konfrans Liqasının qrup mərhələsində davam etdirəcək. Bu, ÇL-in 3-cü təsnifat mərhələsində mübarizəni dayandıracaq bütün klublarla aiddir.
Azərbaycan millisinin hücumçusu Mahir Emrelinin formasını geyindiyi Zaqreb “Dinamo”sunun da növbəti mərhələdəki rəqibi müəyyənləşib. Xorvatiya çempionu bu mərhələdə Bolqarıstana səfər edəcək. İkinci raundda “Şkupi”ni (Şimali Makedoniya) mübarizədən kənarlaşdıran Zaqreb təmsilçisi növbəti mərhələdə “Ludoqorets”lə qarşılaşacaq. “Dinamo” ilk görüşü səfərdə keçirəcək.
UEFA Çempionlar Liqasında 3-cü raundun görüşləri 2-3 və 9-10 avqustda keçiriləcək.
UEFA Çempionlar Liqası
3-cü təsnifat mərhələsi
Çempionlar yolu
Makkabi (Hayfa, İsrail) – Apollon (Limassol, Kipr)
Qarabağ (Azərbaycan) – Ferentsvaroş (Macarıstan)
Ludoqorets (Bolqarıstan) – Dinamo (Zaqreb, Xorvatiya)
Şerif (Moldova) – Viktoriya (Plzen, Çexiya)
Bodo Qlimt (Norveç) – Jalgiris (Litva)
Srvena Zvezda (Serbiya) – Pünik (Ermənistan)
Liqa yolu
Monako (Fransa) – PSV (Niderland)
Dinamo (Kiyev, Ukrayna) – Şturm Qrats (Avstriya)
Yunion (Belçika) – Reyncers (Şotlandiya)
Benfika (Portuqaliya) – Midtyulland (Danimarka)
