Bu gün DÇ-2022-nin pley-off mərhələsinin təxirə salınmış yarımfinal oyunu keçirilib. Arena.az xəbər verir ki, günün yeganə matçı Şotlandiya və Ukrayna milli komandaları arasında baş tutub.
Qlazqo şəhərindəki “Hempden Park” stadionunda keçirilən oyunu niderlandlı FİFA referisi Denni Makkelli idarə edib. Dörd qolun qeydə alındığı qarşılaşma Ukrayna yığmasının inamlı qələbəsiylə yekunlaşıb.
Bu cütün qalibi finalda Uelslə qarşılaşmalı idi. Beləliklə, iyunun 5-də Kardiffdə baş tutacaq həlledici matçda Ukrayna və Uels yığmaları dünya çempionatına sonuncu vəsiqənin sahibini müəyyənləşdirəcəklər.
Xatırladaq ki, UEFA Ukraynadakı müharibə səbəbindən yarımfinal və final görüşlərinin vaxtını dəyişmişdi.
Dünya çempionatının final mərhələsi noyabrın 21-dən dekabrın 18-dək Qətərdə təşkil olunacaq.
DÇ-2022
Pley-off mərhələsi, yarımfinal
1 iyun
Şotlandiya – Ukrayna 1:3
Qol: Makqreqor, 79 – Yarmolenko, 33. Yaremçuk, 49. Dovbik, 90+5.
Baş hakim: Denni Makkelli (Niderland).
Qlazqo, “Hempden Park” stadionu.
