“Vest Hem”in braziliyalı müdafiəçisi, milliləşdirilərək İtaliya yığmasında çıxış edən Emerson Palmyeri dos Santos tarixi ilkə imza atıb.
Arena.az xəbər verir ki, o, UEFA bayrağı altında klublar üçün keçirilən dörd avrokubok turnirində qalib gəlmiş ilk futbolçu kimi tarixə düşüb.
Buna qədər Avropa Liqasının, UEFA Çempionlar Liqasının, UEFA Super Kubokunun qalibi olmağı bacarmış Emersonun kolleksiyası Avropa Konfrans Liqasının kuboku ilə zənginləşib.
O, ilk qitəmiqyaslı qənimətini “Çelsi”də oynayarkən qazanıb. 2018/2019 mövsümündə Avropa Liqasının Bakıda, “Olimpiya Stadionu”nda keçirilmiş finalında “zadəganlar” “Arsenal”ı 4:1 hesabı ilə məğlub etmişdilər. Emerson bütün oyunu meydanda keçirmişdi.
Emersonun növbəti qəniməti 2020/2021 mövsümündə qazandığı UEFA Çempionlar Liqası kubokudur. “Zadəganlar” Portunun “Draqao” stadionunda Xosep Qvardiolanın “Mançester Siti”sini minimal hesabla məğlub etməyi bacarmışdılar. Emerson final oyununu bu dəfə ehtiyat oyunçular skamyasından izləmişdi.
Çempionlar Liqasında qələbə “Çelsi”yə 2021-ci ilin UEFA Super Kubokunda iştirak imakanını vermiş və londonlular bu turnirdə də qalib olmağı bacarmışdılar. “Çelsi” Belfastın “Uindzor Park” stadionunda “Vilyarreal”ı penaltilər seriyasında 6:5 hesabı ilə məğlub etmişdi (əsas və əlavə vaxt: 1:1). Emerson bu dəfə də finalı ehtiyatdan izləmişdi.
Və nəhayət 2022/2023 mövsümü Avropa Konfrans Liqasının Praqada, “Fortuna Arena”da keçirilən finalında 90 dəqiqə meydanda olan Emerson sonda kuboku başı üzərinə qaldırmağı bacarıb. Oyunda həlledici qolu 90-cı dəqiqədə “Vest Hem”in braziliyalı yarımmüdafiəçisi Lukas Paketanın zərgər dəqiqliyi ilə verdiyi ötürmədən sonra qapıçı ilə təkbətək çıxan vinger Carrod Bouen vurub. “Vest Hem” 2:1 hesabı ilə qalib gələrək tarixində ilk dəfə Konfrans Liqasını qazanıb.
Emerson həm də İtaliya yığması ilə 2020 Avropa Çempionatını qazanıb. İngiltərə yığmasına qarşı 118 dəqiqə meydanda mübarizə aparan futbolçu Alessandro Florentsi ilə əvəzlənib. Əsas və əlavə vaxtı 1:1 hesabı ilə başa çatmış oyunun penaltilər seriyasında italyanlar “Uembli”də 3:2 hesablı qələbəyə seviniblər.
Beləliklə Emerson son dörd il ərzində UEFA bayrağı altında keçirilən beş turnirdə qələbə qazanıb ki, müvafiq nailiyyət yalnız ona məxsusdur.
