Türkiyənin “Fənərbaxça” klubu növbəti transferlərini rəsmiləşdirib. Arena.az xəbər verir ki, İstanbul təmsilçisi Braziliyadan olan müdafiəçilər – Qustavo Enrike və Luan Peresi heyətinə qatıb.
Bu barədə klubun rəsmi saytı məlumat yayıb. Qustavo Enrike Braziliya “Flamenqo”sundan 1 illik icarəyə götürülüb. Marsel “Olimpik”indən transfer olunan Luan Pereslə isə 3 illik müqavilə imzalanıb.
Qustavo Enrike “Santos”un yetirməsidir. 29 yaşlı futbolçu 2020-ci ildən “Flamenqo”da çıxış edirdi. Mərkəz müdafiəçisi bu komandanın heyətində meydana çıxdığı 70 oyunda 6 qol da vurub. Qustavo Braziliyanın U-20 və U-23 yığmalarında da oynayıb.
Luan Peres isə ötən ilin yayında “Santos”dan “Olimpik”ə transfer olunmuşdu. Mərkəz müdafiəçisi geridə qalan mövsümdə Marsel təmsilçisinin heyətində 49 oyuna çıxıb, 3 məhsuldar ötürmə ilə yadda qalıb. 28 yaşlı futbolçu daha öncə “Portuqeza”, “Santa Krus”, “Red Bull Brazil”, “İtuano”, “Ponte Preta”, “Fluminense” və “Brügge”də də oynayıb.
Türkiyə mətbuatının yazdığına görə, “Fənər” Luan Peresə görə Fransa klubuna 4.5 milyon avro ödəyib. Mərkəz müdafiəçisi özü isə yeni klubunda ilinə 1.3 milyon avro qazanacaq.
Yeri gəlmişkən, “Fənərbaxça” öz müdafiəçisi Kim Min-Jaeni də İtaliyanın “Napoli” klubuna satıb. Neapol təmsilçisi bu transfer üçün Türkiyə klubunda 18 milyon avro ödəyib. 25 yaşlı futbolçu yeni klubu ilə 3+2 illik müqavilə bağlayıb. Cənubi Koreyadan olan futbolçu isə “Napoli”də ilinə 2.5 milyon avro qazanacaq. İtaliya klubu yeni müdafiəçisinə 45 milyon avro qiymət qoyub.
Kim Min Jae “Fənərbaxça”ya 2021-ci ilin avqustunda Çinin “Beijing Qoan” klubundan 3 milyon avro qarşılığında transfer olunmuşdu. O, bu komandanın heyətində meydana çıxdığı 40 oyunda 1 qol da vurub. Mərkəz müdafiəçisi Cənubi Koreya yığmasının heyətində meydana çıxdığı 42 oyunda 3 qol vurub.
“Napoli”də Mertens erası bitdi
Yeri gəlmişkən, “Napoli” öz oyunçularından Dris Mertenslə də yollarını ayırıb. Tərəflər arasındakı müqaviləyə qarşılıqlı razılıq əsasında xitam verilib. Belçikadan olan 35 yaşlı forvardın karyerasını harada davam etdirəcəyi hələ dəqiq bilinmir.
Dris Mertens 2013-cü ildən “Napoli”də forma geyinirdi. Təcrübəli futbolçu bu komandanın heyətində 397 matça çıxıb, 148 qola imza atıb. O, daha öncə “Utrext”, AQOVV və “Endraxt” kimi klublarda da çıxış edib. Belçika milli komandasında 105 matça çıxmış forvard, 21 qolla yadda qalıb.
