Formula 1-in braziliyalı sabiq pilotu, 2008-ci il çempionluğu üçün FIA-nı məhkəməyə vermiş Felipe Massa bu barədə qərarını əsaslandırıb.
Arena.az “Racingnews365” dərgisinə istinadən məlumat verir ki, Massa vətəni Braziliyada azarkeşlərin titulun taleyinə münasibətini açıqlayıb.
Vurğulayaq ki, Formula 1 üzrə son braziliyalı çempion əfsanəvi Ayrton Sennadır. Senna 1988, 1990, 1991-ci illərdə Formula 1 üzrə dünya çempionu olub.
“Müxtəlif insanlardan inanılmaz dəstək alıram, amma təkcə Braziliyada deyil, bəzən ABŞ-da, Avropada da dəstəyim var. Yürüş dünyasında bir çox insan bəzən dəstək göstərməkdən qorxur, amma avtoidmanda bir çox insan arxamca dayanır, buna görə də tək deyiləm.
Mən bunu ölkəm üçün edirəm, çünki Braziliya, mənim çempion kimi tanınmadığım üçün məğlub oldu. Bu, avtomobil idmanının inkişafı üçün inanılmaz dərəcədə faydalı ola bilər, hazırda isə Formula 1-də braziliyalı pilot yoxdur. Sennanın braziliyalılar üçün etdiklərinə baxanda hər şey fərqli ola bilərdi. Mən özümü Senna ilə müqayisə etmirəm, amma çempionatın ölkə üçün nə qədər vacib olduğunu bilirik”, deyə Massa müsahibəsində bildirib.
Bundan əvvəl, 2008-ci ildə “Ferrari”də çıxış etmiş braziliyalı pilot Felipe Massa Sinqapur qran-prisinin etibarsız sayılması üçün Beynəlxalq Avtomobil Federasiyasına (FIA) müraciət etmişdi.
Xatırladaq ki, “Reno”nun braziliyalı pilotu Kiçik Nelson Pike 2009-cu ildə komanda yoldaşı, ispan pilot Fernando Alonsonun qalib gəlməsi üçün qəsdən qəza törətdiyini etiraf etmişdi. Bu, pilotların şəxsi nəticələrinin yekununda Felipe Massanın mövqeyini itirərək, Luis Hamiltondan 1 xal geridə qalmasına və çempionluğu əldən verməsinə səbəb olmuşdu.
Həmin yarışın nəticələri ləğv olunarsa, Massa 2008-ci il Formula 1 üzrə dünya çempionu olacaq.
Vurğulayaq ki, indi Luis Hamilton əfsanəvi alman pilot Mixael Şumaxerlə birlikdə Formula 1 üzrə yeddiqat dünya çempionu adını bölüşür. Hemilton titullarından birini itirərsə, Şumaxer vahid dünya rekordunu özündə saxlayacaq.
Massa məqsədinin dünya çempionu adına sahib olmasında deyil, ədalətin bərqərar olmasında olduğunu dəfələrlə vurğulayıb.
