“Barselona”nın prezidenti Joan Laporta “blauqrana”nın idman direktoru Dekunun keyfiyyətli iş fəaliyyəti haqda danışıb.
Arena.az “Sport.es” dərgisinə istinadən, ispan məmurun bu barədə fikrini təqdim edir:
“Komandadan və “Hansi” Flikin işindən, həmçinin komandanın əməkhaqqı fondunu 160 milyon avro məbləğində ixtisar etmiş idman direktorumuz Dekunun fəaliyyətindən çox razıyıq. Əvvəllər futbolçuların maaşlarının klubun ümumi gəlirlərinə nisbəti 91% idisə, hazırda 53%-dir. Bundan əlavə, 80 milyon avro məbləğ dəyərində oyunçu satmışıq”, deyə Laporta bildirib.
Yeri gəlmişkən, Laporta klubun hazırda müqavilə müddətini uzatmağı nəzərdə tutduğu futbolçuların adlarını çəkib:
“Biz Arauxo, De Yonq və Pedri ilə yeni müqavilələr üzərində işləyirik. Qavi ilə müqavilənin də müddətinin uzadılacağını təsdiq edə bilərəm”, deyə Laporta bildirib.
İspaniya La Liqasının 9 turundan sonra “Barselona” 24 xalla yarış cədvəlinin zirvəsində qərarlaşıb.
