Futbol üzrə Azərbaycan millisinin hücumçusu Mahir Emreli Polşanın “Rakuv” komandasının heyətində növbəti çempionat oyununa çıxıb.
Arena.az xəbər verir ki, 29 yaşlı futbolçu Polşa çempionatının 2026/2027-ci illər mövsümünün 3-cü turu çərçivəsində bu gün “Krakoviya” ilə qarşılaşmanın iştirakçısı olub.
“Rakuv” səfərdə baş tutmuş görüşdən 1:2 hesablı məğlubiyyətlə ayrılıb. Mahir bu görüşə start heyətdə başlayıb və sonadək mübarizə aparıb. Komandasının 31-ci dəqiqədə vurduğu yeganə qolun məhsuldar ötürməsini də azərbaycanlı futbolçu verib. Amma “Rakuv” ikinci hissədə buraxdığı qollarla meydanı xalsız tərk edib. Bu, sözügedən komandanın cari mövsümdəki ardıcıl üçüncü məğlubiyyətidir. “Rakuv” hazırda 0 xalla sonuncu pillədə qərarlaşıb.
Xatırladaq ki, “Rakuv” Mahiri bu yay Almaniyanın “Kayzerslautern” klubundan satınalma şərti ilə bir mövsümlük icarəyə götürüb. Emreli Polşa klubunun heyətində 7 oyuna çıxıb, 2 qola imza atıb, 1 məhsuldar ötürmə verib.
Mahir Emreli “Kayzerslautern”lə 2025-ci ilin yayında 3 illik müqavilə bağlayıb. Azərbaycanlı futbolçu ötən mövsüm bu komandanın heyətində 13 oyuna çıxıb, 2 qola imza atıb.
Mahir daha öncə Almaniyanın digər klubu “Nürnberq”də də forma geyinib. Azərbaycanlı futbolçu sözügedən komandanın heyətində 25 rəsmi matça çıxıb, 11 qol vurub, 1 assistlə yadda qalıb.
Emreli üçün Polşa çempionatı da tanış liqadır. Belə ki, o, vaxtilə bu ölkənin “Legiya” (Varşava) komandasında çıxış edib, burada 33 oyuna 11 qol və 2 məhsuldar ötürmə müəllifi olub.
“Bakı”nın yetirməsi olan Emreli karyerası ərzində “Qarabağ”, “Konyaspor” (Türkiyə) və “Dinamo” (Zaqreb, Xorvatiya) klublarında da forma geyinib. Hücumçu Azərbaycan milli komandasının heyətində meydana çıxdığı 61 oyunda 6 qol vurub, 3 məhsuldar ötürmə müəllifi olub.
