“Real”ın baş məşqçisi Joze Mourinyo İspaniya La Liqasının 7-ci turunda “Atletiko”ya qarşı keçirdikləri oyundan sonra fikirlərini bölüşüb.
Arena.az xəbər verir ki, görüş “Real”ın 1:2 hesablı məğlubiyyəti ilə başa çatıb.
Oyundan sonra mətbuat konfransına mübahisəli epizodların çap olunmuş şəkilləri ilə gələn Mourinyo hakimlərin idarəçiliyindən narazılığını bildirib. O, rəqib komandanın iki futbolçusunun meydandan qovulmalı olduğunu iddia edib:
“Əslində, mətbuat konfransına gəlməyə də bilərdik. Lazım olan hər şey burada görünür. Burada iki qırmızı vərəqə var. Bu hakim derbini idarə etmək üçün kifayət qədər təcrübəyə malik deyil. Onun beynəlxalq oyun təcrübəsi yoxdur. Buna baxmayaraq, derbiyə təyin edilib. Hakimlər Komitəsini təbrik edirəm, əla işdir”, – deyə Mourinyo bildirib.
Qeyd edək ki, ikinci hissənin əvvəlində “Real” azlıqda qalıb. Din Höysen birbaşa qırmızı vərəqə ilə meydandan qovulub.
“Atletiko”nun baş məşqçisi Dieqo Simeone isə Madrid derbisində qazandıqları qələbədən sonra Mourinyonun hakimliklə bağlı açıqlamalarına münasibət bildirib:
“İlk hissədə oyuna nəzarət edirdik, baxmayaraq ki, qol vəziyyətləri yaranmırdı. Bəzən oyunun gedişatını dəyişən epizodlar olur. Culiano ilə bağlı vəziyyət və penalti də belə anlardan idi.
Mourinyonun sözlərinə gəlincə, deyəcək bir sözüm yoxdur. Hakimlərə hörməti itirmək olmaz. Hətta adın Mourinyo olsa belə, hər şeyə icazə verilmir”, – deyə Simeone açıqlamasında bildirib.
“Atletiko”nun yarımmüdafiəçisi Culyano Simeone də Madrid derbisindən sonra hakimliklə bağlı müzakirələrə münasibət bildirib. O, hakimləri müdafiə edib:
“Mən hakimlərə böyük hörmət bəsləyirəm. Onlar da insandırlar, bəzən hər şeyi düzgün edirlər, bəzən isə səhv edirlər. Əgər belə qərar qəbul ediblərsə, deməli, vəziyyəti belə görüblər. Hakimlərə hörmət edirəm, çünki onlar hər şeydən əvvəl insandırlar”.
Xatırladaq ki, qarşılaşmanın baş hakimi Migel Ortis Arias olub.
