Azərbaycan ağırlıqqaldıranı Ömər Cavadov Beynəlxalq Ağırlıqqaldırma Federasiyasının 2-ci qran-prisində qüvvəsini sınayıb.
Arena.az xəbər verir ki, Qətərin paytaxtı Dohada keçirilən turnir davam edir.
Paris-2024 Olimpiya Oyunlarına lisenziya xarakterli turnirdə 70-dən çox ölkədən 382 (176 qadın + 206 kişi) atlet iştirak edir. Yarışda ağırlıqqaldırma üzrə Azərbaycan yığmasının üzvləri də mübarizə aparırlar. Bu gün onlardan daha biri – Ömər Cavadov da mübarizəyə qoşulub. O, 73 kq çəki dərəcəsində, B qrupunda çıxış edib.
İdmançımız toplam 312 (146+166) kq nəticə göstərib. Cavadovun yekun sıralamada tutduğu yer A qrupundakı çıxışlar bitəndən sonra bilinəcək.
Xatırladaq ki, daha öncə yığmamızın digər üzvü Nazilə İsmayılova da Dohada qüvvəsini sınamış, lakin uğur qazana bilməmişdi.
