“Barselona”nın polyak mərkəz hücumçusu Robert Levandovski daha nə qədər müddət futbol oynayacağını təxmin edib.
Arena.az “Daily Sports” dərgisinə istinadən Levandovskinin bu barədə fikirlərini təqdim edir:
“Artıq nə qazandığımı və ya nə etdiyimi düşünmürəm. Yarışmaq və qalib gəlmək üçün hələ də motivasiyam var.
Düşünürəm ki, üç-dörd il ən yüksək səviyyədə futbol oynaya bilərəm, çünki fiziki olaraq özümü çox yaxşı hiss edirəm”, deyə Levandovski bildirib.
Levandovski “Barselona”ya 2022-ci ilin iyulunda 45 milyon avro müqabilində “Bayern”dən keçib. Tərəflər arasında müqavilə 2026-cı il iyun ayının sonuna qədər qüvvədədir.
Cari mövsümdə isə polyak hücumçu 17 oyunda 8 qol vurub və 4 məhsuldar ötürmə müəllifi olub.
Təcrübəli hücumçu karyerası ərzində “Borussiya” (Dortmund), “Lex” (Poznan), “Zniç”, “Legiya” (Varşava) və “Delta” komandalarında da çıxış edib.
Robert Levandovski hazırda kapitanı olduğu və 2008-ci ilin sentyabr ayında debüt etdiyi Polşa yığmasının heyətində 146 oyun keçirib, 82 qol vurub, 31 məhsuldar ötürmə verib. Robert hər iki göstərici üzrə Polşa yığma komandasının mütləq rekordçusudur.
“Transfermarkt” internet-portalı 35 yaşlı Robert Levandovskini 30 milyon avro məbləğində qiymətləndirir.
