Futbol üzrə İsrail yığmasının və İngiltərənin “Tottenhem” klubunun hücumçusu Manor Solomon uzun müddətə sıradan çıxıb.
Arena.az bu barədə London klubunun rəsmi saytına istinadən xəbər verir.
24 yaşlı vingerin oktyabrın 6-da sağ dizindəki meniskdən əməliyyat olunduğu diqqətə çatdırılıb. Futbolçunun sağalması üçün 2-3 ay vaxt lazım olacaq.
Xatırladaq ki, Manor Solomon “Tottenhem”ə bu ilin yayında Donetsk “Şaxtyor”undan (Ukrayna) azad agent kimi keçmişdi. O, London klubu ilə 5 illik (2028-ci ilin 30 iyununa kimi) müqaviləyə imza atmışdı. Futbolçu indiki komandasında cəmi 6 oyuna çıxıb və 2 məhsuldar ötürmə edib.
Karyerasına “Makkabi” (Petah Tikva) klubunda başlamış Solomon 2019-cu ildən formasını “şaxtaçılar”ın uğurları üçün çalışırdı. O, 2022/2023 mövsümündə icarə əsasında “Fulhem”də çıxış edib.
Solomon İsrail yığmasının heyətində 37 oyuna çıxıb, 7 qol vurub, 9 məhsuldar ötürmə verib.
“Transfermarkt” internet-portalı Manor Solomonu 18 milyon avro məbləğində qiymətləndirir.
