Şimali Makedoniyanın paytaxtı Skopyedə 20 yaşlı oğlanlar arasında basketbol üzrə Avropa çempionatının B Divizionunun oyunlarına start verilib.
Arena.az xəbər verir ki, B Divizionunun C qrupunda yer alan Azərbaycan millisi də bu gün ilk oyununa çıxıb.
Anar Sarıyev və Fərid Əmirovun rəhbərlik etdiyi milli komandamız startda İsveç yığması ilə üz-üzə gəlib. Qarşılaşma Azərbaycan yığmasının məğlubiyyəti ilə bitib – 50:102.
Qeyd edək ki, C qrupunda Azərbaycan və İsveç yığmaları ilə yanaşı, Kosovo, Ukrayna və Gürcüstan seçmələri də yer alıb.
Yığmamızın qrupdakı ikinci oyunu Ukrayna millisinə qarşı olacaq. İyulun 9-da baş tutacaq bu görüşə Bakı vaxtı ilə saat 23:00-da start veriləcək.
Sonda onu da xatırladaq ki, basketbol üzrə Avropa çempionatının bütün oyunları FİBA-nın rəsmi “Youtube” hesabından canlı olaraq yayımlanır.
