“Milan”ın 39 yaşlı yaşlı xorvat əfsanəsi, veteran mərkəz yarımmüdafiəçisi Luka Modriç futbol uzunömürlüyünün sirrini açıb.
Arena.az Modriçin “Milan”ın rəsmi “YouTube” kanalında səsləndirdiyi müvafiq fikrini təqdim edir:
– Sən “Milan”a 39 yaşında gəlmisən, Futbol gəncliyinin sirri nədədir?
– Mən həmişə deyirəm ki, mənim üçün oyunun özünə – futbola olan məhəbbət vacibdir. Mən hələ də buna malikəm – hələ də bu alovu içimdə hiss edirəm. Elə, bu da məni səylə zəhmət çəkməyə, zirvədə olmağım üçün hazırlamağa, ən yaxşı olmağa, ailəmin içində sağlam həyat tərzi sürməyə sövq edir. Sirrini özünə gəlincə, burada çoxlu amillər var, amma mənim üçün bu, futbola olan böyük məhəbbətdir.
Xatırladaq ki, Modriç bu yay “Real”dan azad agent qismində “Milan”a qoşulub. Tərəflər 1 illik – müddəti 2026-cı ilin iyun ayının sonuna qədər qüvvədə olacaq müqavilə imzalayıblar.
Modriç “Milan”da “14” nömrə altında çıxış edəcək.
Luka Modriç Zaqreb “Dinamo”sunun məzunudur. Yarımmüdafiəçi karyerası ərzində həmçinin “Zrinski” (Mostar), “İnter” (Zapreşiç), “Tottenem” və “Real”da oynayıb.
Luka Modriç 2012-ci ildən “Real”da çıxış edirdi. Xorvat futbolçu 2012-ci ilin avqustunda 35 milyon avro məbləğ müqabilində “Tottenhem”dən Madrid klubuna qoşulmuşdu.
Veteran futbolçu 2024/2025-ci illər mövsümündə “Real” üçün bütün yarışlarda 63 oyun keçirib, 4 qol vurub, 9 məhsuldar ötürmə verib.
Lukanın “qaymaqlılar”ın heyətində ümumi oyun statistikası isə göz oxşayır: 597 oyun, 43 qol, 95 məhsuldar ötürmə.
Luka Modriç “Real”la dəfələrlə bütün mümkün əsas klub yarışlarında qalib olub. Lukanın “Real”la qazandığı qənimətlərə 6 UEFA Çempionlar Liqası, 5 FIFA Klub Dünya Kuboku, 5 UEFA Super Kuboku, 4 İspaniya La Liqası, 2 İspaniya Kral Kuboku, 5 İspaniya Super Kuboku və 1 FIFA Qitələrarası Kubok daxildir. Həmçinin Modriç çoxsaylı fərdi mükafatların təltifçisidir. 28 qənimətlə Modriç “Real” tarixində ən zəngin futbolçudur.
Luka Modriç hazırda kapitanı olduğu, 2006-cı ilin martında debüt etdiyi Xorvartiya yığmasının heyətində 188 oyuna çıxıb, 28 qol vurub, 30 məhsuldar ötürmə verib.
“Transfermarkt” internet-portalı 39 yaşlı xorvat veteran yarımmüdafiəçinin transfer dəyərini 4 milyon avro məbləğində qiymətləndirir.
