Son mövsümlərdə uğursuz nəticələri ilə diqqət mərkəzində olan “Neftçi” Azərbaycan Premyer Liqasındakı uğursuz start seriyasına son qoyub.
Arena.az xəbər verir ki, ardıcıl üç mövsümə qələbəsiz başlamış Bakı klubu 2026/2027-ci illər mövsümünün 1-ci turunda “Sumqayıt”a qalib gəlib – 3:1.
“Ağ-qaralar” sonuncu dəfə 2022/2023-cü illər mövsümünə qələbə ilə başlamışdılar. Həmin vaxt bu komanda səfərdə “Şamaxı”nı 1 qolla məğlub etmişdi.
“Neftçi”nin ilk turda ən azı 3 qol vurması isə sonuncu dəfə 2013/2014-cü illər mövsümündə qeydə alınmışdı. 13 il əvvəl paytaxt derbisində AZAL üzərində böyükhesablı ev qələbəsi əldə olunmuşdu – 4:1.
“Ağ-qaralar” startdakı səfər görüşündə 3 və ya daha çox qol vurmağı sonuncu dəfə 25 il əvvəl bacarmışdılar. 2001/2002-ci illər mövsümündə “Ümid”in qonağı olan paytaxt komandası 4 cavabsız qolla qalib gəlmişdi.
