Bu yay “Bayern”lə yollarını ayıran futbol üzrə Almaniya millisinin müdafiəçisi Jerom Boatenq karyerasını Fransada davam etdirəcək. Arena.az xəbər verir ki, 32 yaşlı futbolçu Lion “Olimpik”i ilə müqavilə bağlayıb.
Bu barədə Liqa 1 təmsilçisinin rəsmi saytı məlumat yayıb. Tərəflər 2 illik müqaviləyə imza atıblar. Müdafiəçi yeni komandasına azad agent statusunda keçib.
2011-ci ildən “Bayern”də çıxış edən Jerom Boatenq, Münhen təmsilçisinin heyətində 364 matça çıxıb, 10 qol vurub. O, bu komandanın heyətində 2 dəfə UEFA Çempionlar Liqasının qalibi olub. Təcrübəli müdafiəçi daha öncə “Herta”, “Hamburq” və “Mançester Siti” klublarının da formasını geyinib. 2009-2019-cu illər aralığında Almaniya yığmasında oynamış müdafiəçi, 2014-cü ildə dünya çempionu olub. Millidə 76 oyun keçirmiş futbolçu, 1 qol da vurub.
