“Alanyaspor”un mərkəz yarımmüdafiəçisi Umut Günəş bundan sonra Super Liqanın digər təmsilçisi “Trabzonspor”un formasını geyinəcək.
Arena.az xəbər verir ki, Trabzon klubu 23 yaşlı futbolçunu 2,3 milyon avro qarşılığında heyətinə qatıb.
Almaniyada dünyaya göz açmış türk futbolçu “Trabzonspor”la 4+1 illik müqaviləyə imza atıb.
Umut Günəş “Ştutqart”ın yetirməsidir. O, 2019-cu ildən “Alanyaspor”un uğurları üçün çalışırdı. Yarımmüdafiəçi Alanya klubunda 95 oyuna 6 qol vurub, 5 məhsuldar ötürmə müəllifi olub. O, Türkiyənin müxtəlif yaş qrupları üzrə yığmalarında forma geyinsə də, əsas millidə debüt şansı qazanmayıb.
“Alanyaspor” mərkəz müdafiəçisi Eduardo Bauermannla da yollarını ayırıb. 27 yaşlı futbolçu azad agent kimi komandanı tərk edib. Komandaya elə bu yay cəlb olunmuş braziliyalı müdafiəçinin karyerasını harada davam etdirəcəyi hələ bilinmir. Sonuncu iş yeri “Santos” olan Bauermann “İnternasional”, “Nautiko”, “Atletiko Qoyaniense”, “Fiqeyrense”, “Parana”, “Amerika Mineyro” kimi klubların da formasını geyinib.
Əvəzində “Alanyaspor” heyətini 3 yeni futbolçu ilə gücləndirib. Super Liqa klubu “Vankuver”dən hücumçu Serxio Kordovanı, “Midtyulland”dan sol cinah vingeri Pione Sistonu, “Pasuş de Ferreyra”dan isə mərkəz müdafiəçisi Nuno Limanı heyətinə qatıb. Sisto 2, Kordova və Lima isə 4 illik müqaviləyə imza atıb. Digər iki oyunçunun keçidi pulsuz başa gəlsə də, Kordovanın keçidi üçün “Vankuver”ə 1,8 milyon avro ödəyib.
Kordova “Karakas”, “Auqsburq”, “Arminiya Bilefeld”, “Real Solt Leyk” kimi klubların da formasını geyinib. 26 yaşlı futbolçu Venesuela yığmasında da 15 oyun keçirib.
Sisto “Midtyulland”dan başqa İspaniyanın “Selta” klubunda da forma geyinib. Əslən Uqandadan olan 28 yaşlı futbolçu Danimarka yığmasında 26 oyuna çıxıb, 1 qol vurub.
Nuno Lima isə “Pasuş de Ferreyra”da 52 oyuna 2 qol vurub. Portuqaliyadan olan 22 yaşlı futbolçu bir müddət “Felqeyras”da icarədə də olub.
