Azərbaycanın basketbol üzrə “Sabah” komandası FIBA Avropa Kubokunun müntəzəm mövsümündə (2023/2024) bu gün növbəti oyununa çıxıb.
Arena.az xəbər verir ki, D qrupunda yer almış Azərbaycan çempionu üçüncü oyununda Çexiya təmsilçisi “Nimbruk”la üz-üzə gəlib.
Səfərdə baş tutan qarşılaşma Bakı klubu üçün uğursuz alınıb. Komandamız qrup liderinə də məğlub olub.
Xatırladaq ki, “Sabah” müntəzəm mövsümün ilk görüşündə Monteneqroda “Mornar”a 75:80, ikinci dueldə isə Bakıda Türkiyənin “Baxçaşəhər” komandasına 65:83 hesabıyla uduzmuşdu.
Hazırda “Nimburk” 6 xalla D qrupunda liderlik edir. Sonuncu olan Azərbaycan təmsilçisinin isə hesabında 3 xal var.
FIBA Avropa Kuboku
D qrupu, 3-cü tur
1 noyabr
“Nimbruk” – “Sabah” 92:61
Xal: Nimbruk – 6. Baxçaşəhər – 5. Mornar – 4. Sabah – 3.
Qrupdakı üçüncü oyundan sonra Azərbaycan təmsilçisinin baş məşqçisi Boban Mitev fikirlərini bölüşüb. O, “Nimburk”a məğlubiyyəti belə şərh edib:
“Rəqibi qələbə münasibətilə təbrik edirəm. Onlara qarşı oynamaq bizim üçün çətin oldu. “Nimburk” çox sürətli və aqressiv oyun sərgilədi. Çoxlu 3 xallıq atışlar etdilər və müdafiə ribaundları qazandılar. 22 hücum ribaundu, 18 uğursuz atış və 23 top itkisi. Məğlubiyyətimizə səbəb bunlardır. Rəqibin aqressiv müdafiəsi bizim üçün problem yaratdı”.
