Avropa Futbol Assosiasiyaları İttifaqı (UEFA) Ukrayna Futbol Assosiasiyasını (UAF) azarkeşlərinin davranışı müqabilində cəzalandırıb.
Arena.az bu barədə qitə futbol qurumunun rəsmi saytına istinadən məlumat verir.
Belə ki, UEFA 2024-cü il Avropa çempionatının seçmə mərhələsi çərçivəsində İtaliya yığması ilə oyunda (0:0) azarkeşlərin qanunsuz davranışına görə Ukrayna Futbol Federasiyasının cəzalandırılması barədə qərar qəbul edib.
“Azarkeşlərin irqçi davranışına görə Ukrayna Futbol Assosiasiyası (UAF) 20 min avro məbləğində cərimələnsin. UEFA-nın himayəsi altında keçiriləcək növbəti oyunda Ukrayna milli komandasının stadionunun ən azı 5 min yerlik qismən bağlanmasına göstəriş verilsin”, – rəsmi bəyanatda deyilir.
Xatırladaq ki, AÇ-2024-ün seçmə mərhələsi çərçivəsində Ukrayna və İtaliya yığmaları arasında bu il noyabrın 20-də keçirilmiş oyunda qalib müəyyənləşməmişdi – 0:0. Leverkuzendə (Almaniya) baş tutmuş oyun zamanı ukraynalı azarkeşlər irqçi qışqırıqları ilə diqqət çəkmişdilər.
