Serbiyanın Novi Sad şəhərində 17 yaşadək güləşçilər arasında təşkil olunmuş U-17 Avropa çempionatı davam edir.
Arena.az xəbər verir ki, beşinci yarış günündə qadın güləşi üzrə mübarizəyə yekun vurulub.
Sonuncu gün qızlarımız üçün uğurlu alınıb. Belə ki, 4 güləşçimiz fəxri kürsüyə qalxıb.
Nəzrin Əhmədli (40 kq) təsəlliverici görüşdə belaruslu Anastasiya Kavalçuka (tuş), bürünc medal uğrunda qarşılaşmada isə polşalı Zuzanna Ptaka (10:0) qalib gəlib.
Fatimə Bayramova (53 kq) finalda rusiyalı Olesya Malaxovaya (tuş) məğlub olub və gümüş medalı boynundan asıb.
Günay Qurbanova (61 kq) üçüncü yer uğrunda mübarizədə moldovalı Qabriela Rudoyu üstələyib – 6:1.
Zəhra Kərimzadə (69 kq) təsəlliverici görüşdə litvalı Qreta Tverskiteyə (3:1), bürünc medal uğrunda qarşılaşmada isə slovakiyalı Mixaela Seboekovaya (9:2) qalib gəlib.
Beləliklə, qadın güləşçilərimiz U-17 Avropa çempionatını 1 gümüş, 3 bürünc medalla başa vurublar.
Qeyd edək ki, Serbiyadakı Avropa çempionatı iyunun 30-da başa çatacaq.
