“Espanyol”un sol cinah müdafiəçisi Adria Pedrosa bundan sonra İspaniya La Liqasının digər təmsilçisi “Sevilya”nın uğurları üçün çalışacaq.
Arena.az xəbər verir ki, bu barədə “Sevilya”nın rəsmi saytı məlumat yayıb.
2022/2023 mövsümünün yekununa əsasən “Espanyol”un La Liqanı tərk etməsi səbəbindən Pedrosa azad agent kimi klubdan ayrılıb. Bu üzdən də o, sərbəst futbolçu olaraq “Sevilya” ilə müqavilə bağlayıb. Tərəflər 5 illik sözləşməyə imza atıblar.
Adria Pedrosa “Espanyol”un yetirməsidir. O, karyerası ərzində yalnız Kataloniya təmsilçisinin uğurları üçün çalışıb. 25 yaşlı müdafiəçi bu klubun əsas komandasında keçirdiyi 120 oyunda 7 qol və 13 məhsuldar ötürmə ilə yadda qalıb. Pedrosa İspaniyanın U-21 yığmasında oynasa da, əsas millidə debüt şansı qazanmayıb.
