İtaliya B Seriyasında mübarizə aparan “Sampdoriya”nın baş məşqçisi, italyan mütəxəssis Andre Pirlo istefaya göndərib.
Arena.az bu barədə “Sampdoriya”nın mətbuat xidmətinə istinadən məlumat verir.
Andrea Pirlo 2023-cü ilin yayından “Sampdoriya”nı çalışdırırdı. B Seriyasının son mövsümünün yekunlarına əsasən, “Sampdoriya” yarış cədvəlində 7-ci yeri tutaraq A Seriyasına yüksəlmək tapşırığının öhdəsindən gələ bilməyib.
Cari mövsümə isə Pirlonun yetirmələri bərbad başlayıblar. “Sampdoriya” ilk 3 oyunda cəmi 1 xal toplayıb və hazırda yarış cədvəlinin zirzəmisində – 18-ci pillədə qərarlaşıb.
Məhz bu məqamın “Sampdoriya” rəhbərliyinin səbr kasasını daşdırdığı vurğulanır.
45 yaşlı Pirlonun “dənizçilər”in sükanı arxasında fəaliyyəti 45 oyun, 18 qələbə, 10 heç-heçə, 17 məğlubiyyətdən ibarətdir. “Sampdoiya” Pirlonun rəhbərliyi ilə 70 qol vurub, 73 qol buraxıb.
