Bu gün keçirilən bir oyunla Azərbaycan Basketbol Liqasında (ABL) 2023/2024-cü il mövsümünün 8-ci turuna start verilib.
Arena.az xəbər verir ki, günün yeganə qarşılaşması “Sərhədçi” İdman Mərkəzində baş tutub.
Burada “Xəzri” və “Sərhədçi” komandaları üz-üzə gəliblər. Rəqibə nisbətdə daha üstün oyun nümayiş etdirən “Xəzri” yekunda 117:100 hesablı qazanıb. Qalib komandanın ən məhsuldar basketbolçusu Mark Vital olub – 28 xal, 4 ribaund. “Sərhədçi”də isə Cəbrayıl Əkbərov özündən söz etdirib – 24 xal, 14 ribaund.
Xatırladaq ki, 8-ci turun növbəti oyunları (“Sabah” – “Sumqayıt”, “Xırdalan” – “Neftçi”, “Gəncə” – “Şəki”, “NTD-İndiqo” – “Cəlilabad”) 15, 16 və 17 dekabr tarixlərində baş tutacaq.
Xatırladaq ki, Azərbaycan Basketbol Liqasında bu mövsüm 10 komanda – “Sabah”, “NTD-İndiqo” (Xaçmaz), “Gəncə”, “Xırdalan”, “Sərhədçi”, “Neftçi”, “Cəlilabad”, “Şəki”, “Xəzri” və “Sumqayıt” mübarizə aparır. Çempionat iki dövrədən, yəni 18 turdan ibarət olacaq. Reqlamentə əsasən, müntəzəm mövsümü ilk “altılıq”da tamamlayacaq klublar pley-offa vəsiqə qazanacaqlar. Bu altılıqda ilk iki sıranı tutmuş klublar birbaşa pley-offun yarımfinallarından, digər dörd kollektiv isə 1/4 finallardan mübarizəyə start verəcəklər. 1/4 və 1/2 finallarda ən tez iki qələbə, final seriyasında isə ən tez 3 qələbə qazanmış klub sevinən tərəf olacaq.
Turnir cədvəli
- Xəzri (8 oyun, 7 qələbə, 1 məğlubiyyət) – 15 xal
- Sabah (7 oyun, 6 qələbə, 1 məğlubiyyət) – 13 xal
- NTD-İndiqo (7 oyun, 6 qələbə, 1 məğlubiyyət) – 13 xal
- Neftçi (7 oyun, 5 qələbə, 2 məğlubiyyət) – 12 xal
- Xırdalan (7 oyun, 3 qələbə, 4 məğlubiyyət) – 10 xal
- Cəlilabad (7 oyun, 3 qələbə, 4 məğlubiyyət) – 10 xal
- Sərhədçi (8 oyun, 2 qələbə, 6 məğlubiyyət) – 10 xal
- Sumqayıt (7 oyun, 2 qələbə, 5 məğlubiyyət ) – 9 xal
- Gəncə (7 oyun, 2 qələbə, 5 məğlubiyyət) – 9 xal
- Şəki (7 oyun, 7 məğlubiyyət) – 7 xal
