Almaniyanın “Borussiya” (Mönhenqladbax) klubu heyətini yeni futbolçu ilə gücləndirib. Arena.az xəbər verir ki, Budnesliqa təmsilçisi Portuqaliyanın “Benfika” klubundan Yulian Vayqlı heyətinə cəlb edib.
Bu barədə klubun rəsmi saytı məlumat yayıb. 27 yaşlı dayaq yarımmüdafiəçisi mövsümün sonuna kimi satınalma şərti ilə icarəyə götürülüb. O, yeni komandasında 8 nömrəli formanı geyinəcək.
Yulian Vayql 2020-ci ilin yanvarında 20 milyon avro qarşılığında Dormtund “Borussiya”sından “Benfika”ya transfer olunmuşdu. O, Portuqaliya klubunun heyətində 115 matça çıxıb və 5 qol vurub. Almaniyalı futbolçu Dortmund “Borussiya”sından əvvəl də yetirməsi olduğu “1860 Münhen” klubunun formasını geyinib. Vayql Almaniya yığmasında da 6 oyun keçirib.
Mönhenqladbax “Borussiya”sı sağ cinah müdafiəçisi Jordan Beyeri də İngiltərənin “Bernli” klubuna icarəyə verib. 22 yaşlı futbolçu bu mövsümün sonuna kimi Çempionşip təmsilçisində forma geyinəcək.
Beyer “Borussiya”nın öz yetirməsidir. O, bu klubun əsas komandasında 36 oyuna çıxıb. Müdafiəçi daha öncə “Hamburq”da da icarədə oynayıb, Almaniyanın aşağı yaş qrupları üzrə müxtəlif yığmalarında forma geyinib.
