Futbol üzrə Fransa millisinin baş məşqçisi Didye Deşam dünya çempionatının 1/16 finalında İsveç yığmasına qarşı keçirdikləri oyunu şərh edib.
Arena.az xəbər verir ki, o, 3:0 hesablı qələbədən sonra komandasının növbəti mərhələyə kökləndiyini bildirib.
Didye Deşam komandasının çıxışından razı qaldığını vurğulayıb:
“Bununla fəxr edirik. Missiyamızı yerinə yetiririk, mən də daxil olmaqla hamımız. Bizim oyundan əvvəl 1/16 final mərhələsində bir neçə çətin qarşılaşma izlədik. Müəyyən qədər sərbəst oynadıq, baxmayaraq ki, bəzi məqamlarda daha səbirli ola bilərdik. Bunun qədrini bilməliyik.
Dörd gündən sonra bizi daha bir çətin oyun gözləyir. Futbolçular məhz bunun üçün buradadır. Növbəti addımı atmalıyıq. Həddindən artıq irəli baxmağın mənası yoxdur, çünki futbolda hər şey fərqli cərəyan edə bilər.
Komandamızda kifayət qədər istedad var, amma dörd gündən sonra bunu yenidən sübut etməliyik. Paraqvay Cənubi Amerika futboluna xas ruhu və xarakteri ilə seçilir, bu da onları çox birlikdə oynayan komandaya çevirir. Tələsməyək. Qarşıdakı iki günü bu qələbənin sevincini yaşamağa sərf edəcəyik, sonra isə diqqətimizi yenidən növbəti oyuna yönəldəcəyik”.
İsveç millisinin baş məşqçisi Qrem Potter isə 0:3 hesablı məğlubiyyətdən sonra rəqibin üstünlüyünü etiraf edib. Potter Fransanın tam haqlı qələbə qazandığını bildirib:
“Qarşımıza son dərəcə güclü rəqib çıxmışdı. Bu gün heç bir mübahisəyə yer qoymadan daha yaxşı komanda qalib gəldi. Əlbəttə, futbol futboldur və onlar da hansısa oyunda məğlub ola bilərlər. Ancaq Fransaya uğurlar arzulayıram.
Bu gün ideal oynamalı idik. Düzünü desəm, hətta bunu bacarsaydıq belə, bunun kifayət edib-etməyəcəyinə əmin deyiləm. Çünki rəqib çox yüksək səviyyədə çıxış etdi.
Fransa millisinin futbolçularına baxıb onları bizim heyətlə müqayisə etdikdə görünür ki, biz inkişaf mərhələsində olan gənc komandayıq. Ümid edirəm ki, qarşıda bizi daha çox uğurlu günlər gözləyir”.
