Portuqaliya Futbol Federasiyasının (FPF) nümayəndələri gələn həftə milli komandanın ulduzu Kristiano Ronaldo ilə görüş keçirəcəklər.
Arena.az xəbər verir ki, bu barədə “Marca” nəşri məlumat yayıb.
Federasiya rəhbərliyinin görüş zamanı 41 yaşlı hücumçu ilə milli komandanın baş məşqçisi Jorje Jezus arasındakı münasibətləri yaxşılaşdırmağa çalışacağı bildirilir. FPF Ronaldonun yığmada çıxışını davam etdirəcəyinə ümid edir.
Qeyd edək ki, Ronaldo UEFA Millətlər Liqasının 3-cü turunda Danimarka ilə keçirilən oyundan (4:2) əvvəl Portuqaliya millisinin düşərgəsini tərk edib. Hücumçu bu qərarının səbəbləri barədə gələcəkdə danışacağını bildirib.
Beşqat “Qızıl top” sahibi turnirin 2-ci turunda Norveçlə qarşılaşmada (2:1) da meydana çıxmayıb.
Portuqaliya millisi Jorje Jezusun rəhbərliyi altında UEFA Millətlər Liqasında keçirdiyi hər üç oyunda qələbə qazanıb. Komanda oktyabrın 4-də 4-cü tur çərçivəsində Norveçi qəbul edəcək.
Ronaldo karyerası ərzində 5 dəfə UEFA Çempionlar Liqasının qalibi olub, Avropa çempionu və ikiqat UEFA Millətlər Liqası qalibidir. O, milli komandalar, Avropa çempionatları, UEFA Çempionlar Liqası və klublararası dünya çempionatları tarixində qol rekordlarına sahibdir.
Ronaldo 2022-ci ilin dekabrından Səudiyyə Ərəbistanının “Əl-Nəsr” klubunda çıxış edir. Karyerası ərzində “Sportinq”, “Mançester Yunayted”, “Real” və “Yuventus”un da formasını geyinib. Onun hesabında 979 qol var: 146-sı milli komandada, 833-ü isə klub səviyyəsində.
