Belçikalı futbol mütəxəssisi Hüqo Bros Cənubi Afrika Respublikası milli komandasının baş məşqçisi vəzifəsindən ayrılmağa qərar verib.
Arena.az xəbər verir ki, bu barədə 74 yaşlı məşqçi özü açıqlama verib.
Bros məşqçilik karyerasını da başa vuracağını bildirib:
“Yenidən məşqçi kimi işləyəcəyəmmi? Xeyr. Əgər milliyə başqa sahədə, məsələn, skaut işi ilə bağlı ehtiyac olsa, bunu nəzərdən keçirə bilərəm. Amma futbol artıq həyatımın 24 saatını əhatə etməyəcək”, – deyə belçikalı mütəxəssis söyləyib.
Hüqo Bros 2021-ci ildən Cənubi Afrika millisini çalışdırırdı. Onun rəhbərliyi altında komanda DÇ-2026-nın qrup mərhələsini ikinci pillədə başa vuraraq tarixində ilk dəfə dünya çempionatının pley-off mərhələsinə yüksəlib. Afrika təmsilçisi 1/16 finalda Kanada millisinə 0:1 hesabı ilə uduzaraq mübarizəni dayandırıb.
Brosun rəhbərliyi altında Cənubi Afrika millisi, həmçinin, 2023-cü il Afrika Millətlər Kubokunun bürünc medalını qazanıb.
Futbolçu karyerası ərzində “Brügge” və “Anderlext” klublarının formasını geyinmiş Hüqo Bros sonuncunun heyətində üç dəfə Belçika çempionu, dörd dəfə ölkə kubokunun sahibi olub. O, həmçinin 1983-cü ildə UEFA Kubokunu, 1976 və 1978-ci illərdə UEFA Super Kubokunu, eləcə də iki dəfə Kubok Qalibləri Kubokunu qazanıb.
Bros məşqçi kimi isə “Trabzonspor”, “Anderlext”, “Brügge”, “Genk” və Kamerun millisində çalışıb. Onun rəhbərliyi altında “Brügge” iki dəfə Belçika çempionu və ölkə kubokunun qalibi olub, Kamerun millisi isə 2017-ci ildə Afrika Millətlər Kubokunu qazanıb.
