“Milan”ın braziliyalı keçmiş futbolçusu, skautu, məşqçisi və texniki direktoru Leonardo klub rəhbərliyinin səhvi haqda söhbət açıb.
Arena.az “Quotidiano Sportivo” dərgisinə istinadən məlumat verir ki, braziliyalı mütəxəssis 2023-cü ildə italyan mütəxəssis Paolo Maldininin “Milan”ın texniki direktoru vəzifəsindən kənarlaşdırılmasının rəhbərliyin ən böyük səhvi olduğu qənaətindədir:
“Maldini ilə bağlı necə bir səhv… “Milan”a paltardəyişmə otağında və onun hüdudlarından kənarda bu klubun böyük ruhu gərəkdir? Amma axı o ruh orada idi, onun adı Paolo Maldini idi, məşqçi qismində isə o, İtaliya çempionluğunu qazanmış və Çempionlar Liqasının yarımfinalına qədər gəlib çıxmışdı. Ardınca isə o aradan götürüldü, onunla birlikdə isə böyük şövq də. Bu gün hamı sezib ki, “Milan” içiboşdur, ruhsuzdur. Amma bu, mərhələlərdir, bunlar ötüb-keçəcək. Həmçinin ona görə ki, fikrimcə, klubda, səhv etdiklərini anlayıblar”, deyə Leonardo vurğulayıb.
Xatırladaq ki, Maldini 2018-ci ilin avqust ayında “Milan”ın inkişaf üzrə direktoru təyin edilmiş, bir il sonra isə texniki direktor vəzifəsinə təyinat almışdı. Maldini 2022-ci ilin “Golden Boy Awards” mərasimində “Ən yaxşı avropalı idarəçi” mükafatını qazanmışdı. 2023-cü ilin iyun ayında isə “Milan” rəhbərliyi Paolo Maldinini “rossoneri”nin texniki direktoru vəzifəsindən kənarlaşdırmışdı. O vaxtdan “Milan” nə qədər çalışıb-çapalasa da, yuvarlandığı ortabab səviyyədən qurtula bilmir.
29 oyundan 47 xal toplamış “Milan” İtaliya A Seriyasının yarış cədvəlinin 47-ci pilləsində qərarlaşıb. Hazırda “rossoneri” çempionatın ilk dördlüyünə düşmək uğrunda mübarizə aparır ki, növbəti mövsümün Çempionlar Liqasına vəsiqə əldə etsin. Amma bu, çox müşkül görünür.
