Almaniya futbolunun əfsanəsi Lotar Matteus “Qızıl top”un bu il “Mançester Siti”nin yarımmüdafiəçisi Rodriyə verilməli olduğunu düşünür.
Arena.az xəbər verir ki, veteran futbolçu Rodrinin “Qızıl top”u “Real”ın braziliyalı cinah hücumçusu Vinisius Juniordan daha çox qazanmağa niyə layiq olduğunu belə əsaslandırıb:
“Vinisiusun “Qızıl top”u qazanması mənim üçün böyük gözlənilməzlik olmayacaq. Bu səsvermədə, daha çox qol vurmuş kəs hər zaman diqqət mərkəzində olub. Onun UEFA Çempionlar Liqası və La Liqadakı qələbələri bu mükafata haqq qazandırardı.
Amma şəxsən mən onu bu il dünyanın ən yaxşı futbolçuları siyahısında üçüncü yerdə görürəm. Mənim üçün Rodri “Qızıl top”a Vinisiusdan daha çox layiqdir. O, Avropa çempionatında İspaniya milli komandasının kompası və aparıcısı olub, həmçinin “Mançester Siti” ilə Premyer Liqanın qalibi olub. Komandaları onun yaxşı çıxışları sayəsində bu qənimətləri qazanıblar”, deyə Lotar Matteus bildirib.
Rodriqo Ernandes Madrid “Atletiko”sunun yetirməsidir, ispan “dayaqçı” 2007-2013-cü illərdə “döşəkçilər”in klub sistemində olub. Daha sonra Rodri “Vilyarreal”a keçib. Ancaq 2018-ci ildə yarımmüdafiəçi 2019-cu ilə qədər oynadığı “Atletiko”ya qayıdıb.
Rodri hazırda çıxış etdiyi “Mançester Siti”yə 2019-cu ilin iyulunda 70 milyon avro məbləğ müqabilində elə, “Atletiko”dan keçib. Rodrinin “Mançester Siti” ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə Rodri “şəhərlilər” üçün 3 oyun keçirib, məhsudalr fəaliyyəti ilə diqqət çəkməyib. Təcrübəli yarımmüdafiəçi “şəhərlilər”in heyətində bütövlükdə 260 oyuna çıxıb, 26 qol və 30 məhsuldar ötürmə müəllifi olub.
Rodri “Mançester Siti” ilə İngiltərə Premyer Liqasının (2020/2021, 2021/2022, 2022/2023, 2023/2024), İngiltərə Kubokunun (2023), İngiltərə Liqa Kubokunun (2020, 2021), İngiltərə Super Kubokunun (2020), Çempionlar Liqasının (2022/2023), UEFA Super Kubokunun (2023/2024), FIFA Klub Dünya Kubokunun (2024) qalibi olub. Rodri həmçinin Çempionlar Liqasında 2022/2023-cü illər mövsümünün oyunçusu seçilib.
Rodriqo Ernandes 2018-ci ilin martında debüt etdiyi İspaniya yığmasının heyətində 57 oyun keçirib, 4 qol vurub, 2 məhsuldar ötürmə verib. Rodri İspaniya yığması ilə 2023-cü il UEFA Millətlər Liqasının və 2024-cü il Avropa çempionatının qalibi olub.
