Bu yay İtaliyanın “Latsio” klubundan ayrılan argentinalı cinah yarımmüdafiəçisi Luka Romero azad agent qismində “Milan”a keçib.
Arena.az bu barədə “Milan”ın rəsmi saytına istinadən xəbər verir.
İtaliya nəhəngi istedadlı gənc yarımmüdafiəçi ilə 4 illik müqavilə bağlayıb. 18 yaşlı futbolçu yeni komandasında elə 18 nömrəli formanı geyinməyə qərar verib.
Xatırladaq ki, Luka Romero 2021-ci ilin yayından “Latsio”nun uğurları üçün çalışırdı. O, 2022/2023 mövsümündə paytaxt klubunun heyətində 12 oyuna çıxıb, 1 qol vurub. Yarımmüdafiənin hər iki cinahında oynamağı bacaran futbolçu “Latsio”da bütövlükdə 21 oyun keçirib, 1 qolla yadda qalıb. Argentinalı vinger daha öncə İspaniyanın “Malyorka” klubunun əsas komandasında da 9 oyun keçirib, 1 qol vurub.
Romeronun “Latsio” ilə müqaviləsinin müddəti iyunun 30-da başa çatmışdı. “Transfermarkt” internet-portalı Luka Romeronu 3 milyon avro məbləğində qiymətləndirir.
