Futbol üzrə Azərbaycan milli komandasının yarımmüdafiəçisi Ozan Can Kökçü “Volendam”ın Niderland Erediviziyasını tərk etməsinə üzülüb.
Arena.az xəbər verir ki, sözügedən komanda Niderland çempionatında (Erediviziya) qalmaq uğrunda pley-off oyunlarından məğlubiyyətlə ayrılıb.
Pley-offda “Villem II” ilə qarşılaşan “Volendam” ilk matçda 2:1 hesablı qələbə qazansa da, cavab görüşündə eyni hesabla uduzub. Əlavə vaxtda qol olmadğına görə qalib penaltilər seriyasında dəqiqləşib. Penaltilərdə daha uğurlu olan “Villem II” qələbə qazanıb (5:4) və Erediviziyaya yüksəlib. “Volendam” isə yeni mövsümdə Birinci Liqada mübarizə aparacaq.
Ozan pley-off görüşlərində oynamayıb. Onun adı iştirak ərizəsində də olmayıb.
Xatırladaq ki, Özan Can Kökçü 2025-ci ilin may ayında “Volendam”la 1+1 illik müqavilə imzalayıb. O, Niderland klubuna Finlandiya təmsilçisi HJK-dan azad agent kimi keçib. Millimizin üzvü Niderland klubunun heyətində bütövlükdə 31 oyuna çıxıb, 1 qol vurub, 2 məhsuldar ötürmə verib.
Ozan daha öncə Niderlandda “Eyndhoven”, “Valveyk” və “Telstar”ın, Türkiyədə “Bursaspor” və “Girəsunspor”un, Azərbaycanda “Sabah”ın da uğurları üçün çalışıb. Azərbaycanın U-20 və U-21 yığmalarının formasını geyinmiş futbolçu 2022-ci ildən əsas millimizə dəvət alır. O, Azərbaycan milli komandasının heyətində 14 oyuna çıxıb, 2 məhsuldar ötürmə müəllifi olub.
