Polşanın paytaxtı Varşava şəhərində təşkil olunmuş güləş üzrə “Poland Open” beynəlxalq turniri davam edir.
Arena.az xəbər verir ki, yarışın dördüncü günündə Azərbaycanın sərbəst güləş üzrə yığmasının 2 üzvü mübarizə aparıb.
Osman Nurmaqomedov (92 kq) startda polşalı Filip Roqut üzərində inamlı qələbə qazanıb – 9:0. Nurmaqomedov daha sonra iki amerikalı güləşçini – Maykl Makkiavello (8:2) və Nikolas Stemmeti (11:0) məyus edib. Finalda polşalı Mixal Bielavskiyə heç bir şans tanımayan (10:0) Osman fəxri kürsünün ən yüksək pilləsinə qalxıb.
Georgi Meşvildişvili (125 kq) əvvəlcə bolqarıstanlı Georgi İvanovu (11:0), daha sonra isə almaniyalı Gennadi Kudinoviçi (6:4) üstələyib. Ancaq finalda amerikalı Nikolas Viazdovskiyə 2:9 hesabıyla məğlub olaraq gümüş medalla kifayətlənib.
Sabah milli komandamızın daha 6 üzvü bu turnirdə qüvvəsini sınayacaq.
