“Qarabağ”ın Çempionlar Liqasının pley-off mərhələsindəki qələbəsi Azərbaycanın UEFA reytinqindəki mövqeyinə təsirsiz ötüşməyib.
Arena.az xəbər verir ki, bu qələbə sayəsində Azərbaycan Ukraynaya yaxınlaşıb.
Bu, Ağdam klubunun UEFA Çempionlar Liqasının pley-off mərhələsinin ilk oyununda Macarıstanda “Ferentsvaroş”a qalib gəlməsi (3:1) sayəsində mümkün olub.
“Köhlən atlar” ölkəmizin aktivinə daha 0,250 əmsal yazdırıblar. Nəticədə cari mövsümdə qazanılmış əmsal 2,327-ə yüksəlib.
Hazırda Azərbaycanın son beş mövsüm üzrə hesablanan əmsalı bütövlükdə 19,500-dür. Ölkəmiz 55 UEFA üzvü arasında 28-ci sırada qərarlaşıb. Bizdən öndə 19,725 əmsala malik Ukrayna qərarlaşıb. Hansı ki, cari mövsümdə mübarizə aparan 4 təmsilçisindən 3-ü yoluna davam edir. Azərbaycanı isə Bolqarıstan izləyir. Sözügedən ölkə də əmsalını 18,375-ə çatdırıb. Bolqarların da 4 təmsilçisindən 3-ü hələ yoluna davam edir. Bu isə onların Azərbaycanı qabaqlamaq şansının yüksək olmasından xəbər verir.
Xatırladaq ki, avrokuboklardakı digər təmsilçilərimiz “Zirə”, “Araz-Naxçıvan” və “Sabah” mübarizəni başa vurublar. Bir sözlə, Azərbaycan cari mövsümdəki bütün ümidini “Qarabağ”a bağlayıb. Hansı ki, bu mövsüm üçün qazanılmış 2,375 əmsalın da böyük qismini elə Ağdam klubu qazanıb – 1,250. “Sabah” Azərbaycana 0,625, “Araz-Naxçıvan” 0,375, “Zirə” isə 0,125 əmsal qazandıra bilib.
Qeyd edək ki, reytinq cədvəlinə İngiltərə (94,839) başçılıq edir. İtaliya (84,374) ikinci, İspaniya (78,703) üçüncü, Almaniya (74,545) dördüncü, Fransa isə (67,748) beşincidir.
