İtalyan mütəxəssis Roberto Mançini futbol üzrə Səudiyyə Ərəbistanı yığmasının baş məşqçisi vəzifəsindən istefaya göndərilib.
Arena.az bu barədə Səudiyyə Ərəbistanı yığma komandasının mətbuat xidmətinə istinadən məlumat verir.
Mançini çalışdırdığı kollektivin qeyri-qənaətbəxş nəticələrinə, eləcə də məşqçi ilə komanda arasında münasibətlərin korlanmasına görə vəzifəsindən azad edilib. Ələlxüsus, komandanın son 5 oyunda cəmi 1 qələbə qazanması mənzərəsində italyan mütəxəssislə ərəb komandasının futbolçuları və rəhbərliyi arasında fikir ayrılığının yarandığı vurğulanır.
Xatırladaq ki, Mançini Səudiyyə Ərəbistanı yığmasının sükanı arxasına 2023-cü ilin avqust ayında gətirilmişdi. İtalyan mütəxəssislə müqavilənin müddəti 2027-ci ilin iyun ayının sonuna qədər qüvvədə idi.
Çalışdırdığı müddətdə Mançini Səudiyyə Ərəbistanı yığmasını 18 oyuna çıxarıb, 7 qələbə, 5 heç-heçə, 6 məğlubiyyət yaşayıb. Topların fərqi isə 26:22 nisbətindədir.
59 yaşlı Mançininin növbəti addımları barədə məlumat yoxdur. Səudiyyə Ərəbistanı Futbol Federasiyası (SAFF) isə komandanın sükanını, yığmanı daha əvvəl 2019-cu ilin iyun ayından 2023-cü ilin mart ayına qədər çalışdırmış fransız mütəxəssis Erve Renara həvalə etmək istəyir.
Roberto Mançini Səudiyyə Ərəbistanı millisindən öncə İtaliya yığmasına da rəhbərlik edib. O, Mançini 2018-ci ilin mayından 2023-cü ilin avqustuna qədər ölkəsinin yığmasını çalışdırıb. İtalyan mütəxəssisin uğurlu fəaliyyəti ilə “skuadra adzurra” AÇ-2020-nin qalibi olmağı bacarıb. Bununla yanaşı, Mançini İtaliya yığması ilə UEFA Millətlər Liqasında 2 dəfə bürünc medal qazanıb (2021, 2023). Roberto Mançininin çalışdırdığı kollektiv 2022-ci ildə Çempionların CONMEBOL-UEFA Kuboku çərçivəsində keçirilmiş “Finalissima” oyununda dünya çempionu Argentina yığmasına 0:3 hesabı ilə məğlub olaraq, gümüşlə kifayətlənib.
Roberto Mançini məşqçilik karyerası ərzində İtaliyanın “Fiorentina”, “Latsio” və “İnter”, İngiltərənin “Mançester Siti”, Türkiyənin “Qalatasaray” və Rusiyanın “Zenit” (Sankt-Peterburq) klublarını çalışdırıb. İtalyan mütəxəssis güclü təşkilati bacarığı, meydanda və meydandan kənarda futbol ab-havasını tənzimləyə bilmək qabiliyyəti ilə səciyyəvidir. Maraqlıdır ki, Mançini çalışdırdığı bütün kollektivlərlə uğur qazana bilib.
