İtaliyanın “Roma” komandasını növbəti mövsümdən Joze Mourinyo çalışdıracaq.
Arena.az xəbər verir ki, bu barədə paytaxt klubunun mətbuat xidməti məlumat yayıb.
“Roma”nı hazırda Paulo Fonseka çalışdırır. Lakin paytaxt klubu bu gün yaydığı açıqlamada portuqaliyalı mütəxəssislə mövsümün sonunda yolların ayrılacağını bəyan etmişdi. “Canavarlar” Fonsekanı məhz həmyerlisi ilə əvəz etməyə qərar veriblər. Tərəflər 3 illik müqavilə imzalayıblar.
Qeyd edək ki, son iş yeri İngiltərə “Tottenhem”i olan Joze Mourinyo aprelin 19-da istefaya göndərilib. O, bu komanda ilə yanaşı, ölkəsində “Portu”, İtaliyada “İnter”, İspaniyada “Real”, İngiltərədə “Çelsi” və “Mançester Yunayted”in də baş məşqçisi olub.
Qeyd edək ki, Fonseka 2019-cu ilin yayından “Roma”nı çalışdırırdı. Onun rəhbərlik etdiyi komanda A Seriyasında bu mövsüm 7-ci sırada qərarlaşıb. Ötən həftə isə komanda Avropa Liqasının yarımfinalı çərçivəsində səfərdə İngiltərənin “Mançester Yunayted” klubuna biabırçı hesabla (2:6) uduzmuşdu.
