Bu gün, dekabrın 17-də “Rosario Sentral” və “Platense” komandalarının qarşılaşdığı Argentina Peşəkar Liqa Kubokunun final oyunu keçirilib.
Arena.az məlumat verir ki, komandaların Santyaqo del Esteroda (Argentina) “Unico Madre de Syudades” stadionunda üz-üzə gəldiyi oyun “Rosario Sentral”ın minimal hesablı qələbəsi ilə başa çatıb – 1:0.
Cənubi Amerika futbol ruhuna xas oyun bərabər mübarizə şəraitində keçib. Oyunda yeganə qolu 40-cı dəqiqədə “Rosario Sentral”ın hücumçusu Maksimiliano Lovera vurub. Məhsuldar ötürmənin müəllifi isə Damian Martines olub. “Platense” oyunu azlıqda başa vurub: 77-ci dəqiqədə müdafiəçi Qaston Suso sarı vərəqə alıb, 89-cu dəqiqədə isə ikinci dəfə sarı vərəqə alaraq, oyundan qovulub.
Argentinalı dəmiryolçular ilk dəfə müvafiq kubokun sahibi olublar.
Vurğulayaq ki, Argentina nəhəngi “Boka Xuniors” Argentina Peşəkar Liqa Kubokunu ikiqat qalibidir.
