Futbol üzrə Azərbaycan millisinin sabiq hücumçusu Rüfət Dadaşov Almaniyanın “Dinamo” (Berlin) komandasında növbəti matçına çıxıb.
Arena.az xəbər verir ki, futbolçumuzun komandası bu gün Almaniyanın Şimal-Şərq Regional Liqasının 5-ci turu çərçivəsində “Jena” ilə qarşılaşıb.
“Dinamo” bu rəqiblə doğma meydanda qarşılaşıb. Üç qolun qeydə alındığı matç futbolçumuzun komandasının qələbəsiylə başa çatıb – 2:1.
Rüfət bu oyuna start heyətdə başlayıb və 77-ci dəqiqədə əvəzlənib. Komandasının hər iki qolunu Dadaşov vurub. O, 34-cü dəqiqədə hesabı bərabərləşdiribsə, 37-də də qələbə qolunun müəllifi olub. Bununla da Rüfət cari mövsümdə vurduğu qolların sayını 6-ya çatdırıb.
5 turdan sonra 10 xala malik Berlin “Dinamo”su 18 iştirakçı arasında 3-cü pillədə qərarlaşıb.
Xatırladaq ki, Rüfət Dadaşov “Dinamo”ya bu yay “Şalke”dən azad agent kimi ayrılaraq keçib. Azərbaycanlı hücumçu 2017/2018 mövsümündə məhz “Dinamo”nun uğurları üçün çalışıb. O, həmin vaxt Berlin təmsilçisində 29 oyuna 29 qol vurub, 2 məhsuldar ötürmə müəllifi olub. Rüfət Azərbaycan milli komandasında da 24 oyuna çıxıb, 5 qola imza atıb.
