PSJ-nin və Fransa yığmasının hücumçusu, 2018-ci ilin dünya çempionu Usman Dembele cari mövsümlə bağlı planlarından söhbət açıb.
Arena.az fransalı hücumçunun bu barədə fikrini təqdim edir:
“Bu mövsüm daha çox qol vurmağa çalışacağam. Luis Enrike həmişə mənə deyir ki, qol vurmaq, bəxtimi sınamaq gərəkdir. Çalışıram ki, hər məşqi hücumu məntiqi sonluqla bitirərək başa vurum”, deyə Dembele vurğulayıb.
Xatırladaq ki, Usman Dembele PSJ-yə 2023-cü ilin yay transfer pəncərəsində 50,4 milyon avro müqabilində “Barselona”dan keçib. Fransalı vingerin Paris klubu ilə müqaviləsi 2028-ci ilin iyun ayının sonuna qədər qüvvədədir.
Cari mövsümdə Dembele PSJ-nin heyətində bütün yarışlarda 3 oyuna çıxıb, 1 qol vurub, 3 məhsuldar ötürmə verib. Usman PSJ-də bütövlükdə 45 oyun keçirib, 7 qol, 17 məhsuldar ötürmə müəllifi olub.
Dembele PSJ-dən öncə “Barselona”, “Borussiya” (Dortmund) və “Renn” klublarında forma geyinib.
Usman Dembele 2016-cı ilin sentyabr ayında debüt etdiyi Fransa yığmasının heyətində 51 oyun keçirib, 6 qol vurub, 4 məhsuldar ötürmə verib. O, “xoruzlar”la Rusiyada keçirilmiş DÇ-2018-in qalibi olub.
“Transfermarkt” internet-portalı 27 yaşlı fransalı sağ vinger Usman Dembelenin transfer dəyərini 60 milyon avro məbləğində qiymətləndirir.
