Rumıniyanın ÇFR (Kluj) klubundan “Neftçi”yə keçən Yuri Matias paytaxt klubuna transferi ilə bağlı ilk təəssüratlarını bölüşüb.
Arena.az xəbər verir ki, o, paytaxt klubunun mətbuat xidmətinə açıqlamasında bunları söyləyib:
“İlk təklif baş məşqçi Adrian Mutu tərəfindən gəldi. Çünki o, məni Rumıniyadan tanıyırdı. Baş məşqçi amili “Neftçi”yə gəlməyimdə əsas rol oynadı. Daha sonra agentlərim klubla əlaqə saxladılar. Təkliflə bağlı müzakirələr oldu. Bu barədə danışdığım insanlar da mənə şəhərlə bağlı çox yaxşı sözlər dedilər. Bütün bunlar “Neftçi”ni seçməyə cəlb etdi”.
O, yeni komandasında əsas hədəfinin titullar, çempionluq qazanmaq olacağını söyləyib: “Bilirəm ki, “Neftçi” böyük klubdur. Bütün komanda məni çox yaxşı qarşıladı. Bura gəlməzdən əvvəl Mateusla da söhbətimiz olmuşdu. Komandada portuqalca və ingiliscə danışanlar da var. Hamısı ilə yaxşı ünsiyyət qurmağa çalışıram. İlk məşqdən çox yaxşı təəssüratla ayrıldım. Komanda yoldaşlarımla birlikdə uğurlar qazanmağa çalışacağıq”.
28 yaşlı oyunçu müdafiə xəttinə liderlik etmək bacarığına malik olduğunu əlavə edib: “Bura gətirilməyimdə əsas məqsəd müdafiəni daha da gücləndirmək, bu mövqedə stabillik yaratmaqdır. Bunun üçün arxa xətdəki komanda yoldaşlarımla əlimizdən gələni edəcəyik. Çünki müdafiədə stabillik olanda işlər daha yaxşı gedir. Müdafiə olunmaqdan, arxa xətti idarə etməkdən xoşum gəlir. Komanda yoldaşlarımla birlikdə hər şeyin ən yaxşısını etməyə hazırıq”.
Yuri Matias azarkeşlərdən dəstək istəyib: “Sözsüz ki, komanda yoldaşlarıma kömək etmək üçün maksimum çalışacağam. Ötən mövsüm Avropa Konfrans Liqasının qrup mərhələsində oynamışam, “Latsio” ilə matçda iştirak etmişəm. Düşünürəm ki, təcrübəmdən yararlanıb, komandama daha faydalı olacağam. Öz üzərimizdə çalışacağıq ki, ilk rəsmi oyuna hazır olaq. Azarkeşlərə demək istəyirəm ki, hər zaman bizi dəstəkləsinlər. Biz də komanda olaraq böyük uğurlar qazanmaq üçün bütün gücümüzü qoyacağıq”.
Xatırladaq ki, Matias “Neftçi” ilə 2 illik müqaviləyə imza atıb.
