Almaniyanın “Borussiya” (Dortmund) klubunun hücumçusu Yussufa Mukoko bundan sonra icarə müqaviləsi əsasında “Nitsa”ya keçib.
Arena.az bu barədə Fransa klubunun rəsmi saytına istinadən xəbər verir.
Liqa 1 təmsilçisi 19 yaşlı forvardı bu mövsümün sonunadək satın alma şərti ilə icarəyə götürüb.
Yussufa Mukoko peşəkar karyerasına məhz “Borussiya”da başlayıb. O, Dortmund klubunun əsas komandasında 99 oyuna çıxıb, 18 qol vurub, 8 məhsuldar ötürmə müəllifi olub. O, 2022-ci ilin noyabrında debüt etdiyi Almaniya yığmasında da 2 oyun keçirib.
“Nitsa” heyətinə daha 2 futbolçu cəlb edib. Bunlardan biri “Kan”ın tunisli sol cinah müdafiəçisi Ali Abdidir. 30 yaşlı futbolçunun transfer detalları və müqavilə müddəti açıqlanmır.
2021-ci ildən “Kan”da çıxış edən Ali Abdi bu komandada 99 oyuna çıxıb, 14 qol, 11 məhsuldar ötürmə müəllifi olub. O, Fransada “Paris”in də formasını geyinib. Təcrübəli müdafiəçi Tunis yığmasında 28 oyuna çıxıb, 2 qola imza atıb.
Misirin “Əl-Əhli” klubunun mərkəz müdafiəçisi Məhəmməd Abdelmonem də bundan sonra “Nitsa”da çıxış edəcək. 25 yaşlı futbolçu 4,2 milyon avro müqabilində transfer olunduğu Fransa klubu ilə 4 illik müqaviləyə imza atıb.
Məhəmməd Abdelmonem “Əl-Əhli”nin heyətində 115 oyuna 8 qola imza atıb. O, Misir yığmasında da 29 matç keçirib, 3 qol vurub.
“Nitsa”da iki ayrılıq
“Nitsa” iki futbolçusu ilə də yollarını ayırıb. Əslən Konqodan olan isveçrəli sağ cinah müdafiəçisi Cordan Lotomba “Feyenoord”a keçib. Niderland klubu onun transferi üçün Liqa 1 təmsilçisinə 5 milyon avro ödəyib. 25 yaşlı oyunçu yeni klubu ilə 3 illik müqaviləyə imza atıb.
“Nitsa” Lotombanı 2020-ci ilin avqustunda 7 milyon avroya “Yanq Boyz”dan transfer etmişdi. O, bu komandanın heyətində 143 oyuna çıxıb, 2 qol və 3 assistlə yadda qalıb. “Yanq Boyz”, “Lozanna Sport” kimi klublarda da oynamış müdafiəçi İsveçrə yığmasında 8 oyun keçirib, 1 qol, 1 assistlik performans göstərib.
“Nitsa”nın hücumçusu Aleksis Klod-Moris də Almaniyanın “Auqsburq” klubuna keçib. 26 yaşlı fransalı futbolçu yeni klubuna azad agent kimi keçib və 3 illik müqaviləyə imza atıb.
“Nitsa” “Loryan”ın yetirməsi olan Klod-Morisi 2019-cu ilin avqustunda 13 milyon avroya heyətinə qatmışdı. O, bu klubun heyətində 96 oyun keçirib, 8 qol vurub, 9 assistlə yadda qalıb. Aleksis bir mövsüm “Lans”da icarədə də olub. Fransanın aşağı yaş qrupları üzrə müxtəlif yığmalarında oynamış Klod-Morisə əsas millidə ehtiyac duyulmayıb.
