İspaniyanın “Real Sosyedad” klubu müdafiəçisi Naço Monreal ilə müqavilənin müddətini artırıb.
Arena.az xəbər verir ki, bu barədə La Liqa təmsilçisinin mətbuat xidməti məlummat yayıb.
İspan futbolçu ilə müddəti 2022-ci ilin yayına qədər olan yeni sözləşmə imzalayıb. Əvvəlki müqavilənin müddəti bu yay bitəcəkdi.
Monreal 2019-cu ildən “Real Sosyedad”da çıxış edir. 35 yaşlı müdafiəçi bu mövsüm 25 oyunda meydana çıxıb, 2 qola imza atıb.
Peşəkar karyerasına “Osasuna”da başlayan, 2005-2011-ci illər aralığında məhz bu komandanın uğurları üçün çalışmış Naço Monreal, 2011-2013-cü illərdə də “Malaqa”da forma geyinib. 2013-2019-cu illər aralığında isə o, İngiltərənin “Arsenal” klubunda legioner həyatı keçirib.
Naço İspaniya yığmasında da forma geyinib. O, ölkəsinin əsas komandasında 22 oyuna çıxıb, 1 qola imza atıb.
