“Turan Tovuz”un baş məşqçisi Kurban Berdıyev Premyer Liqanın 29-cu turu çərçivəsində “Zirə”yə qarşı keçirdikləri oyunu şərh edib.
Arena.az xəbər verir ki, sözügedən komandaların bu gün Tovuzda baş tutmuş görüşündə qalib müəyyənləşməyib – 1:1.
Kurban Berdıyev matçdan sonra təşkil edilmiş mətbuat konfransında bunları söyləyib:
“Ümumilikdə pis oyun olmadı. İlk hissədə çox güc sərf etdik. Fasilədən sonra futbolçularda yorğunluq hiss olunurdu. Bəzi əsas heyət üzvlərinin olmaması ikinci hissədə özünü göstərdi. İstənilən halda, uşaqlara təşəkkür edirəm. Mövsümün son oyunlarında gənclərə şans verməyə gəlincə, gənc oyunçular özləri bu şanzı qazanmalıdırlar”.
Xatırladaq ki, “Turan Tovuz” cari mövsümdə keçirdiyi 29 oyunda 16 qələbə qazanıb, 8 heç-heçə edib, 5 məğlubiyyətə üzülüb. Tovuz təmsilçisi 56 xalla yarış cədvəlinin 3-cü pilləsində qərarlaşıb.
