Futbol üzrə Azərbaycan millisinin müdafiəçisi Anton Krivotsyuk Cənubi Koreyanın “Daejeon” komandasında növbəti matçına çıxıb.
Arena.az xəbər verir ki, futbolçumuzun komandası Asiya Çempionlar Liqasının 2026/2027-ci illər mövsümünün əsas mərhələsinin 3-cü turu çərçivəsində Yaponiyanın “Vissel Kobe” kollektivi ilə qarşılaşıb.
“Daejeon Hana Sitizen” bu rəqiblə doğma meydanda üz-üzə gəlib. Krivotsyukun komandası yekunda 0:1 hesablı məğlubiyyətə üzülüb. Anton bu oyuna start heyətdə başlayıb və sonadək mübarizə aparıb. O, komandasının ən yaxşı oyunçusu seçilib.
“Daejeon Hana Sitizen” bu məğlubiyyətdən sonra Asiya Çempionlar Liqasının Şərq konfransının yarış cədvəlində 4 xalla 9-cu pillədə qərarlaşıb.
Xatırladaq ki, Anton Krivotsyuk Cənubi Koreya klubuna 2023-cü ilin fevral ayında Polşanın “Visla” (Plotsk) komandasından 600 min avro qarşılığında transfer olunub. O, bu komandanın heyətində 119 oyuna çıxıb, 6 qol, 3 məhsuldar ötürmə müəllifi olub. 28 yaşlı müdafiəçinin Cənubi Koreya klubu ilə 2027-ci il dekabrın 31-nə qədər nəzərdə tutulmuş müqaviləsi mövcuddur.
Anton daha öncə Azərbaycanda “Neftçi”nin uğurları üçün çalışıb. Mərkəz müdafiəçisi Azərbaycan yığma komandasında da 48 matça çıxıb, 1 qola imza atıb.
