“Roma”nın baş məşqçisi Joze Mourinyo Avropa Liqasının finalında “Sevilya” ilə oyunda hakimləri təhqir etdiyinə görə cəzalandırılıb.
Arena.az bu barədə UEFA-nın mətbuat xidmətinə istinadən xəbər verir.
60 yaşlı portuqal mütəxəssis növbəti mövsümdə 4 avrokubok oyununu tribunadan izləməli olacaq. Bu isə “Roma”nın qarşıdakı Avropa Liqasında qrup mərhələsinin oyunlarının yarıdan çoxu (altı oyundan dördü) deməkdir.
Xatırladaq ki, “Roma” və “Sevilya” arasında Avropa Liqasının 2022/2023 mövsümünün final görüşü mayın 31-də Budapeştdə keçirilib. “Sevilya” penaltilər seriyasında qələbə qazanıb (əsas və əlavə vaxt: 1:1, penaltilərlə: 4:1). Oyunu ingilis hakim Entoni Teylorun rəhbərlik etdiyi hakimlər briqadası idarə edib. Hakim “Roma”nın futbolçularına yeddi sarı vərəqə göstərib.
Oyundan sonra Teylorun işindən narazı qalan Mourinyo stadionun dayanacağında hakimi təhqir edib.
