Əndəlüs klubu “Betis” komandanın ulduzu, ispan hücumameylli yarımmüdafiəçi İsko ilə razılaşaraq, əməkdaşlıq müddətini uzadıb.
Arena.az bu barədə Sevilya təmsilçisinin rəsmi saytına istinadən məlumat verir.
Tərəflər arasında müddəti 2027-ci ilin iyun ayının sonuna qədər qüvvədə olacaq yeni müqavilə imzalanıb. İskonun əvvəlki müqaviləsi 1+1 sxemi üzrə bağlanmışdı. Müqavilənin şəxsi şərtləri haqda təfərrüat açıqlanmayıb.
İsko “Valensiya”nın yetirməsidir. 2011-ci ilin iyulunda “Malaqa”ya transfer edilmiş İsko burada parlayaraq, “Real”ın diqqət mərkəzinə düşüb. 2013-cü ilin iyulunda “Kral Klubu” İskonu öz heyətinə qatıb. 9 il “Real”da parlaq surətdə çıxış etmiş İsko 2022-ci ilin avqustunda madridlilərin düşərgəsini azad agent qismində tərk edərək, “Sevilya”ya keçib. Elə həmin il dekabrın sonlarında İsko o vaxt “Sevilya”nın idman direktoru olan Ramon Monçi ilə münaqişə mənzərəsində klubu tərk edib. 7 ay futbolsuz dolaşmış İsko “Betis”ə cari ilin iyulunda azad agent qismində qoşulub. Vurğulayaq ki, “Betis” “Sevilya”nın qatı rəqibidir.
Cari mövsümün ilk yarısında İsko “Betis”in heyətində bütün yarışlarda 23 oyuna çıxıb, 3 qol vurub, 4 məhsuldar ötürmə verib.
İskonun muzeyi qənimətlərlə zəngindir və bunların hamısı futbolçunun “Real” dövründə qazandığı kuboklardır: 3 İspaniya La Liqası, 1 İspaniya Kral Kuboku, 3 İspaniya Super Kuboku, 5 Çempionlar Liqası, 3 UEFA Super Kuboku, 4 FIFA Klub Dünya Kuboku. Bir sözlə, İsko klub futbolu səviyyəsində bütün mümkün qənimətlərin çoxsaylı qalibidir.
İsko 2013-cü ilin fevralında debüt etdiyi İspaniya yığmasının heyətində 38 oyun keçirib, 12 qol, 6 məhsuldar ötürmə ilə fərqlənib. İstedadlı futbolçu İspaniyanın əsas yığmasına U16-dan U21-ə qədər bütün yolu keçməklə düşüb. İsko İspaniyanın U-21 yığması ilə 2013 Avropa Çempionatının qalibi olub.
“Transfermarkt” internet portalı 31 yaşlı ispan hücumameylli yarımmüdafiəçi İskonun transfer dəyərini 8 milyon avro məbləğində qiymətləndirir.
İskonun futbol məharəti əks edilmiş videoçarxı təqdim edirik:
